గణేశ స్తోత్రాలు

 గణేశ స్తోత్రాలు

శుక్లాం బరధరం విష్ణుం శశివర్ణమ్ చతుర్భుజమ్ | 

ప్రసన్నవదనం ధ్యాయేత్ సర్వ విఘ్నోపశాంతయే ||

అగజానన పద్మార్కం గజానన మహర్నిశమ్ | 

అనేకదంతం భక్తానా-మేకదంత-ముపాస్మహే ||

ఓం గజాననం భూత గనాది సేవితం, 

కపిత జంభు ఫల చారు భక్షణం;

ఉమా సుతం శోక వినాశ కారకం నమామి విఘ్నేశ్వర పాద పంకజం

ఏక దంతయ విద్మహే, వక్రతుండాయ ధీమహీ; తన్నో దంతి ప్రచోదయాత్

గణపతిస్తవః

ఋషిరువాచ-

అజం నిర్వికల్పం నిరాకారమేకం నిరానందమానందమద్వైతపూర్ణమ్ |

పరం నిర్గుణం నిర్విశేషం నిరీహం పరబ్రహ్మరూపం గణేశం భజేమ || ౧ ||

గుణాతీతమానం చిదానందరూపం చిదాభాసకం సర్వగం జ్ఞానగమ్యమ్ |

మునిధ్యేయమాకాశరూపం పరేశం పరబ్రహ్మరూపం గణేశం భజేమ || ౨ ||

జగత్కారణం కారణజ్ఞానరూపం సురాదిం సుఖాదిం గుణేశం గణేశమ్ |

జగద్వయాపినం విశ్వవంద్యం సురేశం పరబ్రహ్మరూపం గణేశం భజేమ || ౩ ||

రజోయోగతో బ్రహ్మరూపం శ్రుతిజ్ఞం సదా కార్యసక్తం హృదాఽచింత్యరూపమ్ |

జగత్కారణం సర్వవిద్యానిదానం పరబ్రహ్మరూపం గణేశం నతాః స్మః || ౪ ||

సదా సత్యయోగ్యం ముదా క్రీడమానం సురారీన్హరంతం జగత్పాలయంతమ్ |

అనేకావతారం నిజజ్ఞానహారం సదా విశ్వరూపం గణేశం నమామః || ౫ ||

తమోయోగినం రుద్రరూపం త్రినేత్రం జగద్ధారకం తారకం జ్ఞానహేతుమ్ |

అనేకాగమైః స్వం జనం బోధయంతం సదా సర్వరూపం గణేశం నమామః || ౬ ||

తమః స్తోమహారం జనాజ్ఞానహారం త్రయీవేదసారం పరబ్రహ్మసారమ్ |

మునిజ్ఞానకారం విదూరే వికారం సదా బ్రహ్మరూపం గణేశం నమామః || ౭ ||

నిజైరోషధీస్తర్పయంతం కరాద్యైః సురౌఘాంకలాభిః సుధాస్రావిణీభిః |

దినేశాంశుసంతాపహారం ద్విజేశం శశాంకస్వరూపం గణేశం నమామః || ౮ ||

ప్రకాశస్వరూపం నభో వాయురూపం వికారాదిహేతుం కలాధారరూపమ్ |

అనేకక్రియానేకశక్తిస్వరూపం సదా శక్తిరూపం గణేశం నమామః || ౯ ||

ప్రధానస్వరూపం మహత్తత్వరూపం ధరాచారిరూపం దిగీశాదిరూపమ్ |

అసత్సత్స్వరూపం జగద్ధేతురూపం సదా విశ్వరూపం గణేశం నతాః స్మః || ౧౦ ||

త్వదీయే మనః స్థాపయేదంఘ్రియుగ్మే జనో విఘ్నసంఘాతపీడాం లభేత |

లసత్సూర్యబింబే విశాలే స్థితోఽయం జనో ధ్వాంతపీడాం కథం వా లభేత || ౧౧ ||

వయం భ్రామితాః సర్వథాఽజ్ఞానయోగాదలబ్ధాస్తవాంఘ్రిం బహూన్వర్షపూగాన్ |

ఇదానీమవాప్తాస్తవైవ ప్రసాదాత్ప్రపన్నాన్సదా పాహి విశ్వంభరాద్య || ౧౨ ||

ఏవం స్తుతో గణేశస్తు సంతుష్టోఽభూన్మహామునే |

కృపయా పరయోపేతోఽభిధాతుముపచక్రమే || ౧౩ ||

ఋణ విమోచన గణేశ స్తోత్రం -కర హృదయాది న్యాసః

అస్య శ్రీ ఋణహర్తృ గణపతి స్తోత్ర మంత్రస్య | సదాశివ ఋషిః | అనుష్టుప్ ఛందః | శ్రీ ఋణహర్తృ గణపతి దేవతా | గౌం బీజం | గం శక్తిః | గోం కీలకం | సకల ఋణనాశనే వినియోగః |

శ్రీ గణేశ | ఋణం ఛింది | వరేణ్యం | హుం | నమః | ఫట్ |

ఇతి కర హృదయాది న్యాసః |

ధ్యానం

సిందూరవర్ణం ద్విభుజం గణేశం లంబోదరం పద్మదళే నివిష్టం

బ్రహ్మాదిదేవైః పరిసేవ్యమానం సిద్ధైర్యుతం తం ప్రణమామి దేవం ||

స్తోత్రం

సృష్ట్యాదౌ బ్రహ్మణా సమ్యక్పూజితః ఫలసిద్ధయే

సదైవ పార్వతీపుత్రః ఋణనాశం కరోతుమే || ౧ ||

త్రిపురస్యవధాత్పూర్వం శంభునా సమ్యగర్చితః

సదైవ పార్వతీపుత్రః ఋణనాశం కరోతుమే || ౨ ||

హిరణ్యకశ్యపాదీనాం వదార్థే విష్ణునార్చితః

సదైవ పార్వతీపుత్రః ఋణనాశం కరోతుమే || ౩ ||

మహిషస్యవధే దేవ్యా గణనాథః ప్రపూజితః

సదైవ పార్వతీపుత్రః ఋణనాశం కరోతుమే || ౪ ||

తారకస్య వధాత్పూర్వం కుమారేణ ప్రపూజితః

సదైవ పార్వతీపుత్రః ఋణనాశం కరోతుమే || ౫ ||

భాస్కరేణ గణేశోహి పూజితశ్చ సుశిద్ధయే

సదైవ పార్వతీపుత్రః ఋణనాశం కరోతుమే || ౬ ||

శశినా కాంతివృద్ధ్యర్థం పూజితో గణనాయకః

సదైవ పార్వతీపుత్రః ఋణనాశం కరోతుమే || ౭ ||

పాలనయ చ తపసాం విశ్వామిత్రేణ పూజితః

సదైవ పార్వతీపుత్రః ఋణనాశం కరోతుమే || ౮ ||

ఇదం ఋణహరం స్తోత్రం తీవ్ర దారిద్ర్య నాశనం

ఏకవారం పఠేన్నిత్యం వర్షమేకం సమాహితః || ౯ ||

దారిద్ర్యం దారుణం త్యక్త్వా కుబేర సమతాం వ్రజేత్

పఠంతోఽయం మహామంత్రః సార్థ పంచదశాక్షరః || ౧౦ ||

శ్రీ గణేశం ఋణం ఛింది వరేణ్యం హుం నమః ఫట్

ఇమం మంత్రం పఠేదంతే తతశ్చ శుచిభావనః || ౧౧ ||

ఏకవింశతి సంఖ్యాభిః పురశ్చరణ మీరితం

సహస్రవర్తన సమ్యక్ షణ్మాసం ప్రియతాం వ్రజేత్ || ౧౨ ||

బృహస్పతి సమో జ్ఞానే ధనే ధనపతిర్భవేత్

అస్యైవాయుత సంఖ్యాభిః పురశ్చరణ మీరితః || ౧౩ ||

లక్షమావర్తనాత్ సమ్యగ్వాంఛితం ఫలమాప్నుయాత్

భూత ప్రేత పిశాచానాం నాశనం స్మృతిమాత్రతః || ౧౪ ||

ఇతి శ్రీకృష్ణయామల తంత్రే ఉమా మహేశ్వర సంవాదే ఋణహర్తృ గణేశ స్తోత్రం సమాప్తం ||

ఏకదంతస్తోత్రం

మదాసురం సుశాంతం వై దృష్ట్వా విష్ణుముఖాః సురాః |

భృగ్వాదయశ్చ మునయ ఏకదంతం సమాయయుః || ౧ ||

ప్రణమ్య తం ప్రపూజ్యాదౌ పునస్తం నేమురాదరాత్ |

తుష్టువుర్హర్షసంయుక్తా ఏకదంతం గణేశ్వరమ్ || ౨ ||

దేవర్షయ ఊచుః

సదాత్మరూపం సకలాదిభూత

-మమాయినం సోఽహమచింత్యబోధమ్ |

అనాదిమధ్యాంతవిహీనమేకం

తమేకదంతం శరణం వ్రజామః || ౩ ||

అనంతచిద్రూపమయం గణేశం

హ్యభేదభేదాదివిహీనమాద్యమ్ |

హృది ప్రకాశస్య ధరం స్వధీస్థం

తమేకదంతం శరణం వ్రజామః || ౪ ||

విశ్వాదిభూతం హృది యోగినాం వై

ప్రత్యక్షరూపేణ విభాంతమేకమ్ |

సదా నిరాలంబ-సమాధిగమ్యం

తమేకదంతం శరణం వ్రజామః || ౫ ||

స్వబింబభావేన విలాసయుక్తం

బిందుస్వరూపా రచితా స్వమాయా |

తస్యాం స్వవీర్యం ప్రదదాతి యో వై

తమేకదంతం శరణం వ్రజామః || ౬ ||

త్వదీయ-వీర్యేణ సమస్తభూతా

మాయా తయా సంరచితం చ విశ్వమ్ |

నాదాత్మకం హ్యాత్మతయా ప్రతీతం

తమేకదంతం శరణం వ్రజామః || ౭ ||

త్వదీయ-సత్తాధరమేకదంతం

గణేశమేకం త్రయబోధితారమ్ |

సేవంత ఆపూర్యమజం త్రిసంస్థా-

స్తమేకదంతం శరణం వ్రజామః || ౮ ||

తతస్త్వయా ప్రేరిత ఏవ నాద-

స్తేనేదమేవం రచితం జగద్వై |

ఆనందరూపం సమభావసంస్థం

తమేకదంతం శరణం వ్రజామః || ౯ ||

తదేవ విశ్వం కృపయా తవైవ

సంభూతమాద్యం తమసా విభాతమ్ |

అనేకరూపం హ్యజమేకభూతం

తమేకదంతం శరణం వ్రజామః || ౧౦ ||

తతస్త్వయా ప్రేరితమేవ తేన

సృష్టం సుసూక్ష్మం జగదేకసంస్థమ్ |

సత్త్వాత్మకం శ్వేతమనంతమాద్యం

తమేకదంతం శరణం వ్రజామః || ౧౧ ||

తదేవ స్వప్నం తపసా గణేశం

సంసిద్ధిరూపం వివిధం బభూవ |

సదేకరూపం కృపయా తవాఽపి

తమేకదంతం శరణం వ్రజామః || ౧౨ ||

సంప్రేరితం తచ్చ త్వయా హృదిస్థం

తథా సుదృష్టం జగదంశరూపమ్ |

తేనైవ జాగ్రన్మయమప్రమేయం

తమేకదంతం శరణం వ్రజామః || ౧౩ ||

జాగ్రత్స్వరూపం రజసా విభాతం

విలోకితం తత్కృపయా తథైవ |

తదా విభిన్నం భవదేకరూపం

తమేకదంతం శరణం వ్రజామః || ౧౪ ||

ఏవం చ సృష్ట్వా ప్రకృతిస్వభావా-

త్తదంతరే త్వం చ విభాసి నిత్యమ్ |

బుద్ధిప్రదాతా గణనాథ ఏక-

స్తమేకదంతం శరణం వ్రజామః || ౧౫ ||

త్వదాజ్ఞయా భాంతి గ్రహాశ్చ సర్వే

నక్షత్రరూపాణి విభాంతి ఖే వై |

ఆధారహీనాని త్వయా ధృతాని

తమేకదంతం శరణం వ్రజామః || ౧౬ ||

త్వదాజ్ఞయా సృష్టికరో విధాతా

త్వదాజ్ఞయా పాలక ఏవ విష్ణుః |

త్వదాజ్ఞయా సంహరకో హరోఽపి

తమేకదంతం శరణం వ్రజామః || ౧౭ ||

యదాజ్ఞయా భూర్జలమధ్యసంస్థా

యదాజ్ఞయాఽపః ప్రవహంతి నద్యః |

సీమాం సదా రక్షతి వై సముద్ర-

స్తమేకదంతం శరణం వ్రజామః || ౧౮ ||

యదాజ్ఞయా దేవగణో దివిస్థో

దదాతి వై కర్మఫలాని నిత్యమ్ |

యదాజ్ఞయా శైలగణోఽచలో వై

తమేకదంతం శరణం వ్రజామః || ౧౯ ||

యదాజ్ఞయా శేష ఇలాధరో వై

యదాజ్ఞయా మోహకరశ్చ కామః |

యదాజ్ఞయా కాలధరోఽర్యమా చ

తమేకదంతం శరణం వ్రజామః || ౨౦ ||

యదాజ్ఞయా వాతి విభాతి వాయు-

ర్యదాజ్ఞయాఽగ్నిర్జఠరాదిసంస్థః |

యదాజ్ఞయా వై సచరాఽచరం చ

తమేకదంతం శరణం వ్రజామః || ౨౧ ||

సర్వాంతరే సంస్థితమేకగూఢం

యదాజ్ఞయా సర్వమిదం విభాతి |

అనంతరూపం హృది బోధకం వై

తమేకదంతం శరణం వ్రజామః || ౨౨ ||

యం యోగినో యోగబలేన సాధ్యం

కుర్వంతి తం కః స్తవనేన స్తౌతి |

అతః ప్రమాణేన సుసిద్ధిదోఽస్తు

తమేకదంతం శరణం వ్రజామః || ౨౩ ||

గృత్సమద ఉవాచ –

ఏవం స్తుత్వా చ ప్రహ్లాద దేవాః సమునయశ్చ వై |

తూష్ణీం భావం ప్రపద్యైవ ననృతుర్హర్షసంయుతాః || ౨౪ ||

స తానువాచ ప్రీతాత్మా హ్యేకదంతః స్తవేన వై |

జగాద తాన్మహాభాగాన్దేవర్షీన్భక్తవత్సలః || ౨౫ ||

ఏకదంత ఉవాచ –

ప్రసన్నోఽస్మి చ స్తోత్రేణ సురాః సర్షిగణాః కిల |

శృణు త్వం వరదోఽహం వో దాస్యామి మనసీప్సితమ్ || ౨౬ ||

భవత్కృతం మదీయం వై స్తోత్రం ప్రీతిప్రదం మమ |

భవిష్యతి న సందేహః సర్వసిద్ధిప్రదాయకమ్ || ౨౭ ||

యం యమిచ్ఛతి తం తం వై దాస్యామి స్తోత్రపాఠతః |

పుత్రపౌత్రాదికం సర్వం లభతే ధనధాన్యకమ్ || ౨౮ ||

గజాశ్వాదికమత్యంతం రాజ్యభోగం లభేద్ధ్రువమ్ |

భుక్తిం ముక్తిం చ యోగం వై లభతే శాంతిదాయకమ్ || ౨౯ ||

మారణోచ్చాటనాదీని రాజ్యబంధాదికం చ యత్ |

పఠతాం శృణ్వతాం నృణాం భవేచ్చ బంధహీనతా || ౩౦ ||

ఏకవింశతివారం చ శ్లోకాంశ్చైవైకవింశతిమ్ |

పఠతే నిత్యమేవం చ దినాని త్వేకవింశతిమ్ || ౩౧ ||

న తస్య దుర్లభం కించిత్త్రిషు లోకేషు వై భవేత్ |

అసాధ్యం సాధయేన్మర్త్యః సర్వత్ర విజయీ భవేత్ || ౩౨ ||

నిత్యం యః పఠతే స్తోత్రం బ్రహ్మభూతః స వై నరః |

తస్య దర్శనతః సర్వే దేవాః పూతా భవంతి వై || ౩౩ ||

ఏవం తస్య వచః శ్రుత్వా ప్రహృష్టా దేవతర్షయః |

ఊచుః కరపుటాః సర్వే భక్తియుక్తా గజాననమ్ || ౩౪ ||

ఇతీ శ్రీ ఏకదంతస్తోత్రం సంపూర్ణమ్ ||